مسحراتى مصر البهية
اصحى وسبح رب البرية
مشيت ارتل وانشد واجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم اقبل
وان كنت قبلى.. لازم ابحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى احنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى شبرا وخلوصى
خالع سنانى وخالع ضروسى
ومدرس ابنى واخد فلوسى
كأنه مؤمن وأنا المجوسى
مدرس ابني.. بقى بيحاسبنى
على حلاوة درسه الخصوصى
والعلم ضايع.. بيقول لصايع
يا عم قطع.. رقم جلوسى
يا عم شوقى.. يا ابن الأصول
يا أمير زمانك ف الشعر.. قول
صحيح يا شوقى ان المعلم
ف زمانكو قرب يكون رسول؟!
طب ليه المعلم اللى ف زمانا
ما بقاش ينور أجمل شموسى
ومدرس ابنى واخد فلوسى
■ ■ ■
الأبجدية شدت شعورها
لما المعلم منع مرورها
وقال تروحى للى هايدفع
واللى هاتدفع تستنى دورها
الضلمة ركبت عقول ولادنا
والعلم أصبح خارج قاموسى
■ ■ ■
ومدرس ابنى واخد فلوسى
صحوا الإدارة.. التعليمية
واصحوا معاها يا أهل المالية
عيب.. المعلم يعيش عوالة
وعيب يناضل مع الماهية
لما المربى.. يتعب ياربى
أحلامى تركع قدام كابوسى
ومدرس ابنى واخد فلوسى
■ ■ ■
مسحراتى ف الذكر هايم
والنسمة حلوة ولاحد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب

الله يامسحراتى يوه قصدى الله يامودى حلو اوى اوى تحفه

ابقى تعالى كل يوم تحت البيت وانا هبقى اشوفك اخر الشهر هههههههههههههههههه

تسلم الايادى ياكبير

وماله بس ابقى افتكرينى وقت السحور وبعدين انا لسه هستنى لاخر الشهر

اشوفك وزيرة الماليه..................

ساعتها ولا هعرف هههههههههههههههههه يارب ياخويا مفيش حاجه بعيده عن ربنا بس رشحونى انتو بس

يا خوفى نرشحك وتعمليها وتخلعى زى اللى خلعوااااااااااااااااااا

جميل جدااااااااااااااا تسلم يامودي

أسعدنى مرورك يا نوووووووووووووووووووور ونورتى الدنيا يلا بقى همتك وتعالى اشتغلى معايا وظيفه تمام ومضمونه

موضوع جميل يامودي ومتميز وكل موضوعاتك جميله جدا تسلم ايديك

تسلميلى يا غاليه ايه رايك تنضميلنا فالشغلانه دى واهو نشجع الشباب برده

انا ياريت والله انا حتي فاضيه :G: هههههههههههههههه
من امتي بقي هنبدا وانا هلف فين بالضبط وفين الطبله هههههههههههههههه