ممنوع عبادة الأوطان..
ممنوع تعيش فِ الحياة..
تِشبه بَني الإنسان
ممنوع تحت الشموس
تحلم بحَبِّة ضِل
...ممنوع فى ضي القمر
تلضُم قصايد فـُل
إياك تتكلم
إياك تتألم
أحسن لك استسلم
طول مانت عايش عـربى
ممنوع تعـَلـِّـى الصوت
مطلوب مِنك فقط…
تتهَجَى كلمة "سكوت"
مطلوب منك فقط…
تؤدى دور الموت
اللى إنكتب للعربى
***
ممنوع عليك تصحى
ممنوع عليك تحلم
ممنوع عليك تحيا
ممنوع عليك تنطق
ممنوع عليك تنقد
فصول المسرحية
احفظ دورك وذاكِر
جوانب الشخصية
مرسوم دورك بدِينـك…
تبقى فى المسرحية…
أدوارك إرهابية
إياك تقول سلام…
إياك تقول شَـرعية
ممنوع عليك تناضل
ممنوع عليك تجادل
ممنوع عليك تدافع
التهمة ثابته عليك
وعلى كل واحد عايش
بديانة إسلامية
………….
كومبارس بنبقى دايما
فى معارك الدّولية
وبنندبح وندفع
للى دبحنا الديّة
طمعان فى خير بلادنا…
والثروة البتروليّة
يسرق أحلام ولادنا
ويقول …. إرهابية
مايستاهلوش يعيشوا
على الكرة الأرضية
وتحت شعار حقوق
ونشر ديمقراطية
يبقى حق العرب
إبادة… جماعية
……….
يا ضمير الكون يا صاحى
تعالى شوف مين فينا
حضارته ارهابية
وشعاره الهمجية
تعالى قول مين عايش
بثقافة بربرية .

لما كل ده ممنوع فين اللى مش ممنوع ربنا يستر علينا ياايمى

تسلمى حبيبتى

يارب ياسمر ربنا يخليكي

أحسن لك استسلم
طول مانت عايش عـربى

ميرسي علي المشاركة