اصول اللعب

اللى بجد

شد وجذب

وجذب وشد

حد بيلعب

فى دماغ حد

و حد بيهرب

من كذا حد

ولا فيهم حد

حاسس بحد

حد يخطط

وحد يخبط

وحد يلغبط

تفكير حد

غدر وكدب

لابعد حد

بدأ اللعب

جذب وشد

و الحكايه قلبت جد

ولازم حد

يكسب حد

اما الناس

مش عايزه حد

ولا احلال

ولا تجديد

ولا فكر عال

ولا فكر جديد

جايب معاه

مليون ايد

ايد قويه

ومفتريه

و ايد عفيه

وايد خفيه

فى الخزانه

بتتمد

ولا معارض

ولا مستقل

ولا حتى وطنى

و مستغل

جوانا غل

لأى حد

حافظين كلامهم حرف حرف

سمعنا بدل الوعد الف

حتى الشريط بدا يسف

ودماغنا محتاجالها هيد

مش محتاجبن خناق وعند

وناس تزق

وناس تشد

وناس بتبنى

وناس تهد

واب وابن

و ابن وجد

و ناس تنافق

و ناس تود

و ناس تقول

ده احلى حد

و العيشه ماشيه

و احلى آشيه

وكل الحاشيه

زى بعض

واللعب

يحلى ميتنهيش

دوامه دايره

ويا مين يعيش

و اياك بجد

تقول لحد

عن اللى هد

حلمنا

ملناش حد يحبنا

هما حد

واحنا حد